‘‘Inventio Mundi. Galicia nas viaxes transoceánicas. Séculos XV- XVII’‘ é unha exposición producida polo Consello da Cultura Galega baixo o comisariado de Ofelia Rey Castelao na que se amosa as consecuencias que tivo para Galicia a expedición Magalhães/Elcano, que partiu hai 500 anos.

Unha trintena de paneis repasan a historia desta época da navegación galega e como esta historia foi reflectida a través do imaxinario popular que recolleron grandes autores e investigadores da literatura galega ao longo dos tempos.

“ Inventio mundi” recupera a historia de grandes navegantes como Sebastián de Ocampo, que demostrou o carácter insular de Cuba; Fernando de Andrade, responsable de varias viaxes oceánicas de Galicia; Gómez Pérez das Mariñas, que navegou polo Pacífico ou Pedro Sarmiento de Gamboa, clave para entender a cartografía da época, entre outros.

A mostra poderá visitarse no espazo adicado ás exposicións temporais do 2º edificio do Museo e permanecerá aberta ao público do 7 de febreiro ao 12 de abril de 2020 no horario de apertura habitual do museo

A mostra ademais contará cunha serie de actividades ao seu redor das que iremos informando nas redes sociais do museo.